Պատմությունը

Khosrov Kotak

Խոսրով Կոտակ

«Խոսրովի  անտառ» պետական արգելոցի արմատները թաղված են պատմության խորքում և հասնում են մինչև մեր թվարկության 4-րդ դարը` Արշակունյաց դինաստիա, Խոսրով 3-րդ Արշակունի թագավոր… Պատմական աղբյուրները վկայում են, որ «Խոսրովի անտառ» արտահայտությունը կապված է Խոսրով Գ Կոտակ թագավորի հետ: Մասնավորապես, ըստ պատմահայր Մովսես Խորենացու, նրա գահակալության տարիներին պատմական Այրարատ նահանգում` Արաքսի ափից, Դվինի մոտակայքից մինչև Ազատ գետը ձգվող տարածքում կատարվել են անտառատնկումներ:

Այրարատ նահանգը` Պատմական Հայաստանի աշխարհագրական քարտեզում

Այրարատ նահանգը` Պատմական Հայաստանի աշխարհագրական քարտեզում

Խոսրով Կոտակը անտառի տարածքում ստեղծել է թռչունների և կենդանիների հատուկ որսատեղեր: Խոսրովի արհեստական անտառի տնկման թվագրությունն ընդգրկում է 330-338 ընկած ժամանակահատվածը:

Անտառի առանձին հատվածներ պահպանվել են մինչև մեր օրերը և 1958 թվականին այդ հատվածներն ընդգրկող տարածքը վերածվեց արգելոցի:

Խոսրովի անտառ պետական արգելոցը Հայաստանի 3 արգելոցներից մեկն է`  «Էրեբունի» և «Շիկահող» արգելոցների հետ: 3 արգելոցները միասին 35439.6 հեկտար են, որը կազմում է ՀՀ տարածքի 1,19 տոկոսը: